ಮೂಡುಬೆಳ್ಳೆ ಅರುಣಾ ಕ್ಲಿನಿಕ್ ಗೆ 65 ವರ್ಷ
ಮೂಡುಬೆಳ್ಳೆ: ಇಂದಿಗೆ ಸುಮಾರು 65 ವರ್ಷಗಳ ಹಿಂದೆ ಮೂಡುಬೆಳ್ಳೆಯ ಗ್ರಾಮೀಣ ಪ್ರದೇಶದಲ್ಲಿ ಕ್ಲಿನಿಕಲ್ ಪ್ರ್ಯಾಕ್ಟೀಸ್ ಆರಂಭಿಸಿ ತುರ್ತು ಆರೋಗ್ಯ ಸಂದರ್ಭಗಳಲ್ಲಿ ಹಗಲು - ರಾತ್ರಿ ಎನ್ನದೆ ತನ್ನ ಸ್ಕೂಟರ್ ನಲ್ಲಿ ಸಂಚರಿಸಿ, ರಸ್ತೆಯೇ ಇಲ್ಲ ಎನ್ನುವಂಥ ಕಡೆಗಳಲ್ಲೂ ಕಾಲ್ನಡಿಗೆಯಲ್ಲೇ 'ಚಿಕಿತ್ಸಾ ಪೆಟ್ಟಿಗೆ' ಹೊತ್ತುಕೊಂಡು ರೋಗಿಗಳ ಮನೆಗಳಿಗೆ ಭೇಟಿ ನೀಡಿ ಚಿಕಿತ್ಸೆ ನೀಡುತ್ತಿದ್ದವರು ಮೂಡುಬೆಳ್ಳೆಯ ಡಾ| ರಮೇಶ್ ರಾವ್ ಕೊರಡ್ಕಲ್ ಅವರು.
ತನ್ನ ಸ್ಕೂಟರನ್ನೇ ಸಂಚಾರಿ ಆಸ್ಪತ್ರೆಯನ್ನಾಗಿಸಿದ್ದ ಅವರು ಯಾವ ಸಮಯದಲ್ಲೂ ಜನರಿಗೆ ಲಭ್ಯವಾಗುತ್ತಿದ್ದರು. ಬಡವರಿಗೆ, ಶಾಲಾ ವಿದ್ಯಾರ್ಥಿಗಳಿಗೆ ಉಚಿತ ಚಿಕಿತ್ಸೆ ನೀಡುತ್ತಿದ್ದರು. ಸಾಮಾಜಿಕವಾಗಿ ಗ್ರಾಮದ ಅಭಿವೃದ್ಧಿಗಾಗಿ ಅಪಾರ ಶ್ರಮ ಪಟ್ಟವರು.
ಖ್ಯಾತ ಸಾಹಿತಿ, ಸರಸ್ವತೀ ಬಾಯಿ ರಾಜವಾಡೆಯವರಂಥ ಯುವ ಸಾಹಿತಿಗಳಿಗೂ ಪ್ರೇರಣೆ ನೀಡುತ್ತಿದ್ದ ಶಿಕ್ಷಕ ಶ್ರೀನಿವಾಸ ರಾವ್ ಕೊರಡ್ಕಲ್ ಅವರ ಕಿರಿಯ ಪುತ್ರರಾಗಿ 1935 ಜೂನ್ 10ರಂದು ಜನಿಸಿದ ಅವರು ಉಡುಪಿ ಬೋರ್ಡ್ ಹೈಸ್ಕೂಲಿನಲ್ಲಿ ತಮ್ಮ ಆರಂಭಿಕ ವಿದ್ಯಾಭ್ಯಾಸವನ್ನು ಪಡೆದರು. ಅವರ ತಾಯಿ ಸತ್ಯಭಾಮೆ. ಮುಂದೆ ಮದ್ರಾಸ್ ಮೆಡಿಕಲ್ ಕಾಲೇಜಿನಲ್ಲಿ ಎಂಜಿಸಿಇ ಪದವಿಯನ್ನು ಪಡೆದರು.
1961ರಲ್ಲಿ ಮೂಡುಬೆಳ್ಳೆಯಲ್ಲಿ 'ಅರುಣಾ ಕ್ಲಿನಿಕ್' ಮೂಲಕ ವೈದ್ಯಕೀಯ ಸೇವೆ ಆರಂಭಿಸಿದ ಅವರು ವೈದ್ಯಕೀಯ ಸಹಿತ ಮೂಲ ಸೌಕರ್ಯಗಳಿಲ್ಲದ ಸಂದರ್ಭದಲ್ಲಿ ಜನರ ಸೇವೆಗೆ ಕಟಿಬದ್ಧರಾಗಿ ನಿಂತವರು. ಬೆಳ್ಳೆಯಿಂದ ಪಳ್ಳಿಯ ವರೆಗೂ ಅವರು ಸೇವೆ ಸಲ್ಲಿಸುತ್ತಿದ್ದರು. ಐಎಂಎ ಉಡುಪಿ ಮತ್ತು ರೋಟರಿ ಕ್ಲಬ್ ಉಡುಪಿ ಇದರ ಸದಸ್ಯರಾಗಿದ್ದರು. ೧೯೬೩ರಲ್ಲಿ ಲಕ್ಷ್ಮೀ ಅಮ್ಮ ಅವರನ್ನು ವಿವಾಹವಾದರು. ದಂಪತಿಗೆ ೪ ಮಂದಿ ಮಕ್ಕಳು.
ಸಮಸಮಾಜದ ಒಲವು: ಡಾ| ಕೊರಡ್ಕಲ್ ಅವರು ಜಾತಿ, ಮತ, ಧರ್ಮದ ಗಡಿಗಳನ್ನು ಮೀರಿದ ವ್ಯಕ್ತಿಯಾಗಿದ್ದರು. ಶ್ರಮ ಸಂಸ್ಕೃತಿಯನ್ನು ಗೌರವಿಸುತ್ತಿದ್ದರು. ಸಮ ಸಮಾಜದ ಒಲವನ್ನು ಹೊಂದಿದ್ದರು. ಚೆನ್ನಾಗಿ ವಿದ್ಯಾಭ್ಯಾಸ ಮಾಡುವ ಮಕ್ಕಳನ್ನು ಕಂಡರೆ ಅವರಿಗೆ ಅತ್ಯಂತ ಅಚ್ಚುಮೆಚ್ಚು. ಅವರಿಗೆ ತನ್ನಿಂದ ಸಾಧ್ಯವಾಗುವಷ್ಟು ಸಹಕಾರ ನೀಡುತ್ತಿದ್ದರು. ಬೇರೆಡೆ ವಿದ್ಯಾಭ್ಯಾಸಕ್ಕೆ ತೆರಳುತ್ತಿದ್ದ ಬಡ ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಸಹಾಯ ಮಾಡುತ್ತಿದ್ದರು. ಅಲ್ಲಿರುವ ತಮ್ಮ ಪರಿಚಯಸ್ಥರಿಗೆ ಪತ್ರ ನೀಡಿ ಸಹಾಯ ಮಾಡುವಂತೆ ಕೋರುತ್ತಿದ್ದರು. ಪ್ರಸ್ತುತ ಅವರ ಸೊಸೆ ಡಾ| ರಾಜೇಶ್ವರಿ ಗೋಪಾಲಕೃಷ್ಣ ರಾವ್ ಕೊರಡ್ಕಲ್ ಅವರು ಅರುಣಾ ಕ್ಲಿನಿಕ್ ಮುನ್ನಡೆಸುತ್ತಿದ್ದಾರೆ. ಅವರ ಮಕ್ಕಳೂ ವೈದ್ಯಕೀಯ ಶಿಕ್ಷಣ ನಡೆಸುತ್ತಿದ್ದು ಡಾ| ಕೊರಡ್ಕಲ್ ಅವರ ಸೇವಾ ಪರಂಪರೆ ಮುಂದುವರಿಯುತ್ತಿದೆ.















.jpeg)
.jpeg)
